На жаль, моўная практыка складаецца такім чынам, беларускай літаратурнай мовай людзі карыстаюцца толькі падчас нейкіх мерапрыемстваў, урачыстасцей, на школьных уроках мовы і літаратуры і г. д.
Менавіта таму па ініцыятыве галоўнага ўпраўлення ідэалагічнай работы, культуры і па справах моладзі Гродзенскага аблвыканкама з мэтай папулярызацыі беларускай мовы, літаратуры і культуры і ў сувязі з 500-гадовым юбілеем беларускага кнігадрукавання з 11 па 17 верасня ў бібліятэках праводзіўся Інфармацыйны тыдзень «Гаворым і чытаем па-беларуску». А ў бібліятэчных установах раёна мерапрыемствы, прымеркаваныя да гэтай значнай даты, ладзіліся з пачатку года.
У раённай бібліятэцы вырашылі пачаць гэты тыдзень творчай сустрэчай з кіраўніком раённага літаратурнага аб’яднання «Муза» Анастасіяй Токаравай-Самушчык. Вучні 10-х класаў гімназіі №1 азнаёміліся з творчасцю нашай таленавітай зямлячкі.
Госцем наступнай сустрэчы стаў Сяргей Клімковіч — беларускі пісьменнік, журналіст, член Саюза пісьменнікаў Беларусі, аўтар шматлікіх раманаў. На мерапрыемства, якое прайшло ў дыялогавай форме, былі запрошаны студэнты Ваўкавыскага педагагічнага каледжа. Самыя актыўныя атрымалі ў падарунак кнігу з аўтографам аўтара.
У рамках Тыдня бібліятэкары раёна прынялі ўдзел у абласной акцыі «Чытаем разам». У гарадской дзіцячай бібліятэцы прайшла гадзіна паэтычнага настрою «Прамяністае святло таленту», прымеркаваная да 135-годдзя з дня нараджэння класіка беларускай літаратуры Я. Купалы. Прынялі ўдзел у ёй вучні 9 «Б» класа СШ № 4, настаўніца беларускай мовы і літаратуры Таццяна Дуброўка, а таксама загадчык сектара ідэалагічнай работы аддзела ідэалагічнай работы, культуры і па справах моладзі Таццяна Сяргеева.
Супрацоўнікі раённай бібліятэкі падрыхтавалі літаратурна-музычную кампазіцыю «А на зямлі імёнаў іх не згасне свет», прысвечаную 135-годдзю з дня нараджэння беларускіх класікаў Я. Купалы і Я. Коласа. Вершы вялікіх беларускіх песняроў разам з навучэнцамі Ваўкавыскага педагагічнага каледжа чытаў старшыня Ваўкавыскага раённага Савета дэпутатаў Віталь Навіцкі.
У гэты ж дзень у раённай бібліятэцы ў рамках студыі літаратурнага развіцця для дашкалят «Я расту!» сумесна з супрацоўнікамі Ваўкавыскага тэрытарыяльнага цэнтра сацыяльнага абслугоўвання насельніцтва было праведзена інтэрактыўнае падарожжа «Ад глінянай таблічкі да друкаванай старонкі», прысвечанае 500-годдзю беларускага кнігадрукавання. Напрыканцы мерапрыемства дзецям урачыста былі ўручаны чытацкія білеты.
15 верасня адбыўся раённы семінар бібліятэчных работнікаў «Беларускае кнігадрукаванне: ад вытокаў да сучаснасці». Разглядаліся пытанні гуманістычна-асветніцкай функцыі бібліятэк у сучасным грамадстве, дзейнасць бібліятэк па папулярызацыі здабыткаў нацыянальнай культуры і інш. А таксама адбылося ўрачыстае віншаванне бібліятэкараў з прафесійным святам — Днём бібліятэк.
У раённай дзіцячай бібліятэцы адбылася размова ля кніжнай паліцы «Цудоўны свет беларускай дзіцячай кнігі», у Роскай гарпасялковай бібліятэцы праведзены ўрок ведаў «Не згасне цуд прыгожага пісьменства». Супрацоўнікі гарадскога філіяла па вул. Барычэўскага правялі для маленькіх чытачоў «прышчэпку ад непісьменнасці» — «Адкрываем, як свет, нанова, беларускае роднае слова». У БЦНК п. Юбілейны адбылася паэтычная гадзіна «І след свой пакінуў паэт», прымеркаваная да 105-годдзя з дня нараджэння М. Танка. У раённай бібліятэцы прайшоў дзень інфармацыі «Сучасная беларуская літаратура» і інш.
Дзякуючы друкаванай кнізе чалавецтва мае магчымасць захоўваць і перадаваць з пакалення ў пакаленне магутны інфармацыйны патэнцыял, увесь вопыт папярэдніх пакаленняў. І пачэсная місія бібліятэкараў данесці гэты скарб да карыстальнікаў, далучыць да сусветнай скарбонкі інтэлектуальнай спадчыны як мага большую колькасць насельніцтва.
Тыдзень закончыўся, але праца бібліятэк па папулярызацыі здабыткаў нацыянальнай культуры працягваецца. Азнаёміцца са скарбамі нацыянальнай літаратурнай спадчыны вы можаце, наведаўшы бібліятэкі раёна. Запрашаем!
Надзея ГУДКО, загадчык аддзела маркетынгу Ваўкавыскай раённай бібліятэкі.
Оперативные и актуальные новости Волковыска и района в нашем Telegram-канале. Подписывайтесь по ссылке!
Правила использования материалов "Наш час" читайте здесь.