У рамках мерапрыемства прайшоў занальны тур агляду-конкурсу абласнога фестывалю «Панямоння жыватворныя крыніцы». Наш раён на святочнай сцэне дастойна прадставілі народны фальклорны гурт “Чараўніцы”, узорны фальклорны гурт “Чобаты”, фальклорны гурт “Спадарыня”, а таксама юныя выканаўцы побытавых танцаў Паліна і Нікіта Сарокі.

Госці свята мелі ўнікальную магчымасць здзейсніць падарожжа да культурных вытокаў і бліжэй пазнаёміцца з багатай спадчынай, якая засталася нам ад прадзедаў. Народныя песні і танцы, стравы беларускай кухні і народныя рамёствы Панямоння былі шырока прадстаўлены на святочных пляцоўках. Жадаючыя маглі не толькі пагля­дзець і набыць прыгожыя вырабы, але і паспрабаваць стварыць іх сваімі рукамі падчас майстар-класаў. А таксама прыняць удзел у традыцыйных гульнях і забавах, пакаштаваць і прыгатаваць стравы беларускай кухні на выставе-дэгустацыі і навучыцца танцаваць старадаўнія побытавыя танцы, а затым па­ўдзельнічаць у флешмобе «Танцуем па-даўнейшаму».

— Свята традыцый і фальклору сёлета прайшло ў Ізабеліне ўпершыню, але адразу спадабалася яго ўдзельнікам, — адзначыла намеснік дырэктара Ваўкавыскага раённага цэнтра культуры Вольга Урбановіч. — Супрацоўнікі раённага цэнтра культуры, якія выступілі яго арганізатарамі, ставілі перад сабой мэту не проста прапанаваць цікавы адпачынак для мясцовага насельніцтва і гасцей, але і далучыць іх да культурнай спадчыны, аднавіць цікавасць да традыцыйных рамёстваў і творчасці. І можна адзна­чыць, што ў нас гэта атрымалася. Свята ўжо атрымала мноства станоўчых водгукаў. І, магчыма, стане традыцыйным.