І сёння кастрычніцкія падзеі не пакідаюць цікавіць (ці цікаваць?). Мы штораз звяртаемся (ці вяртаемся?) да гісторыі, каб пераасэнсаваць падзеі (ці дзеі?) “чырвонага дня календара”. Любая рэвалюцыя — гэта ахвяры, апраўдаць (ці спраўдзіць?) якія з цягам часу ўсё цяжэй. Можна бясконца шукаць вінаватых (ці павінных?). Прасцей за ўсё падвяргаць асуджэнню (ці асуджанасці?). Пераасэнсоўваючы мінулае, важна помніць: гісторыя патрабуе далікатнага абыходжання (ці абыходлівасці?).

АДЧУЙ РОЗНІЦУ

Цікавіць (рус. интересовать, занимать). Выклікаць цікавасць, звяртаць на сябе ўвагу. Дзедавы прылады, што віселі ў хлеўчыку, даўно цікавілі ўнука.

Цікаваць (рус. следить, подстерегать, высматривать). Сачыць, падпільноўваць, выглядаць. Пад лаваю кот і днём, і ноччу цікаваў за мышкамі.

Звяртацца (рус. обращаться). Пры напісанні сачынення мы звяртаемся да літаратурных крыніц.

Вяртацца (рус. возвращаться). Дадому з лесу паляўнічыя ніколі не вярталіся з пустымі рукамі.

Падзея (рус. событие, происшествие). Здарэнне, выпадак, важная, выдатная з’ява. Гэта гістарычная падзея выклікае многа спрэчак.

Дзея (рус. действие). Дзейнасць, справа, учынкі, паводзіны. Там добрая дзея, дзе два арэ, а трэці сее. Развіццё падзей у літаратурным творы. Закончаная частка драматычнага твора.

Апраўдаць (рус. оправдать) Даказаць невінаватасць. Апраўдаць такі яго ўчынак нават маці не змагла. Даказаць патрэбу. Праявіць сябе вартым. Кампенсаваць, акупіць.

Спраўдзіць (рус. выполнить, исполнить, подтвердить делом). Не любое жаданне можна спраўдзіць.

Вінаваты (рус. виноватый, виновный). Які правініўся, з’яўляецца прычынай, усведамляе сваю віну, мае доўг. У аварыі быў вінаваты пешаход.

Павінен (рус. должен, обязан). Вымушаны што-небудзь рабіць або мець якую-небудзь якасць. Хочаш стаць спецыялістам — павінен вучыцца.

Асуджэнне (рус. осуждение). Вынесці абвінаваўчы прыгавор. Выказаць неадабрэнне. Прызнаць ганебным. Дакор і асуджэнне былі ў бацькавым позірку.

Асуджанасць (рус. обречённость). Стан асуджанага. Пачуццё фатальнай асуджанасці сціскала горла.

Абыходжанне (рус. обхождение, обращение, поведение). Выяўленне сваіх адносін. Манера паводзін. Уменне карыстацца чым-небудзь. Абыходзіліся з госцем ветліва, добразычліва.

Абыходлівасць (рус. обходительность, вежливость). Ветлівасць, далікатнасць у абыходжанні. Гаспадары вызначаліся асаблівай абыходлівасцю.