Вядучыя мітынга нагадалі, што сцяг, герб і гімн — гэта сімвалы, якія прайшлі доўгі шлях станаўлення, развіцця і зацвярджэння, у іх захаваны рысы, што адлюстроўваюць мірныя і стваральныя мэты беларускага народу. Гэта атрыбуты моцнай і незалежнай дзяржавы, сапраўды ўсенародныя сімвалы нацыі, якія беларусы абіралі ўсім грамадствам. Яны аб’ядноўваюць пакаленні, натхняюць на подзвігі і здзяйсненні, абуджаюць пачуцці любові і павагі да сваёй Радзімы.

Права ўзняць Дзяржаўны сцяг пад гукі Дзяржаўнага гімна Рэспублікі Беларусь было прадастаўлена ўладальніку звання “Чалавек года Гродзеншчыны-2023”, галоўнаму механіку філіяла № 1 “Цэментны завод” ААТ “Краснасельскбудматэрыялы” Аляксандру Маркоўскаму і пераможцы заключнага этапа рэспубліканскай алімпіяды па рускай мове, вучаніцы 11 класа СШ № 7 Кацярыне Градовіч. Прагучалі верш і песня, прысвечаныя сцягу нашай краіны.

— Штогадова мы ўсёй краінай ушаноўваем сімвалы сваёй Радзімы. Іх сэнсавае напаўненне складаецца з традыцыйных каштоўнасцей нашага народа, адлюстроўвае міласэрнасць і прыязнасць, душэўную шчодрасць і гатоўнасць падзяліцца ўсім, што мы маем, пры гэтым захоўваючы непарушную пазіцыю ў ахове незалежнасці і суверэнітэту нашай дзяржавы. Адметна, што мы заўсёды адзначаем гэта свята адразу пасля Дня Вялікай Перамогі, бо нашы сімвалы непарыўна звязаны з гераічнай гісторыяй нашай краіны. 79 гадоў таму абаграны крывёю нашых бацькоў і дзядоў Сцяг Перамогі быў узняты над будынкам гітлераўскай цытадэлі — Рэйхстагам. І як для воінаў-пераможцаў дарагі Чырвоны Сцяг, так для кожнага з нас дарагія сцяг, герб і гімн роднай Беларусі. Яны аб’ядноўваюць нас у самыя важныя моманты ў лёсе Айчыны — ад нацыянальных святаў да спартыўных перамог. І ў які б куточак свету не закінула жыццё, яны заўжды нагадваюць нам пра дом, даюць магчымасць адчуць, што Беларусь — гэта ўсе мы разам, — адзначыў, віншуючы прысутных з дзяржаўным святам, намеснік старшыні Ваўкавыскага райвыканкама, старшыня раённага аддзялення Беларускай партыі “Белая Русь” Ігар Салавей. Ён уручыў членскія пасведчанні партыі людзям, якія папоўнілі яе шэрагі.

Прайшла таксама ўрачыстая цырымонія развітання з піянерскім гальштукам і ўручэння членскіх білетаў Беларускага рэспубліканскага саюза моладзі. Юнакі і дзяўчаты, якія толькі што былі прыняты ў самае масавае маладзёжнае аб’яднанне краіны, прынеслі Клятву вернасці Дзяржаўным сімвалам Рэспублікі Беларусь. З пранікнёным нумарам, напоўненым любоўю да Радзімы, выступілі прадстаўнікі гарадскога Дома культуры — салістка Кацярына Клімчук і танцавальны калектыў “Гарачы лёд”. У завяршэнне мітынгу ўрачыстым маршам перад гледачамі прайшлі ваеннаслужачыя і супрацоўнікі сілавых структур раёна.

#символыбеларуси_на_гродненщине