Свята стала яркай падзеяй у жыцці не толькі Лідскага раёна, але і ўсёй вобласці. У ім прынялі ўдзел больш за 100 танцораў з 9 раёнаў Гродзенскай вобласці. У рамках фестываля праводзіўся конкурс выканаўцаў побытавых танцаў. Ваўкавыскі раён прадстаўлялі 6 пар розных узроставых катэгорый.
Усё было «па-даўнейшаму»: і знешні выгляд удзельнікаў, і сама атмасфера свята, якую напаўняла цудоўная энергетыка самабытнага беларускага танца. Народным традыцыям адпавядалі не толькі касцюмы танцораў: тканыя спаднічкі, вышытыя сукенкі і фартушкі, чырвоныя стужкі, белыя хусцінкі і саламяныя капелюшы. Удзельнікі ўражвалі натуральнасцю паводзін, стрыманасцю, той унутранай культурай, якая фарміруецца ў крапатлівай, уважлівай і ашчаднай рабоце па авалоданню мясцовымі традыцыямі, танцавальным мастацтвам.
Танцоры з нашага раёна прадставілі на свяце «Мясцовую польку» і «Лявоніху», «Каханачку» і польку «Бабачку», «Лысага», «Ойру», «На рэчаньку», «Кракавяк», «Падыспань» і іншыя рэгіянальныя танцы. Танцавалі прыгожа, заліхвацка, аддаючы часцінку сваёй душы — таму і вынікі атрымаліся выдатныя: усе шэсць пар атрымалі званні лаўрэатаў. Пераможцамі ў сваіх узроставых групах прызнаны Ілля Валасюк і Кацярына Жукоўская (11—13 год, Воўпаўскі ДК, мастацкі кіраўнік — Таццяна Кароль), Аляксандр Пятчыц і Іна Траян (14—17 год, Шылавіцкі ДК, мастацкі кіраўнік — Наталля Сайко), Раман Бескаравайны і Ксенія Бусловіч (18—30 год, Рупейкаўскі ДК, мастацкі кіраўнік — Святлана Мікшута). Лаўрэатамі другой ступені сталі ўдзельнікі з самай малодшай групы, ад 7 да 10 год, Павел Смурага і Мар'яна Наумік з Мацвееўскага ДК. Ім дапамагла падрыхтавацца мастацкі кіраўнік Марына Хацітоўская, якая разам з Аляксеем Урублеўскім з Ізабелінскага ДК прымала ўдзел у конкурсе сярод танцораў ад 31 да 50 год. Пара таксама атрымала Дыплом лаўрэата ІІ ступені. Старэйшую ўзроставую катэгорыю, тых, каму за 50, прадстаўлялі ад нашага раёна Часлаў Апановіч і Святлана Мікшута (Ваўкавыскі РЦКНТ), якія занялі трэцяе месца.
Такім чынам, усе нашы пары апынуліся на ганаровых месцах і атрымалі заслужаныя ўзнагароды. Застаецца дадаць, што падрыхтавацца да конкурса танцорам дапамаглі спецыялісты Ваўкавыскага раённага цэнтра культуры і народнай творчасці і асабіста — вядучы метадыст Святлана Мікшута.
— Мы правялі вялікую работу, вывучылі танцы, падрыхтавалі касцюмы: даматканыя спадніцы, вышываныя кашулі, саламяныя капелюшы і сапраўдныя ваўкавыскія паясы, зробленыя па традыцыях простага двухнітовага ткацтва Надзеяй Развадоўскай. Працавалі з цікавасцю, з захапленнем, — расказала Святлана Васільеўна. — Я упэўнена, што такія конкурсы вельмі патрэбны і ўдзельнікам, і гледачам, бо яны трансліруюць у людскія сэрцы глыбіню жыццёвай народнай філасофіі, этыкі і маралі, замацоўваюць перадачу народных традыцый, выхоўваюць у падрастаючага пакалення патрэбнасць берагчы і памнажаць гэтыя традыцыі, любіць сваю «малую Радзіму».
Фотаздымкі прадастаўлены РЦКНТ.
Оперативные и актуальные новости Волковыска и района в нашем Telegram-канале. Подписывайтесь по ссылке!
Правила использования материалов "Наш час" читайте здесь.