Я, кандыдат ад Партыі БНФ, лічу прыярытэтам абарону нацыянальных інтарэсаў: забеспячэнне палітычнай, ваеннай, эканамічнай, энергетычнай ды інфармацыйнай незалежнасці Беларусі, адраджэнне нашай мовы і культуры, аднаўленне дэмакратычнага кіравання і пераход да новай эканамічнай мадэлі для свабоды і дабрабыту беларускага народа.
Састарэлыя праграмы аўтарытарнага ўрада завялі краіну ў палітычны і эканамічны тупік. Чыноўнікі
спрабуюць схавацца ад адказнасці, перакладаючы цяжар крызісу на беларускі народ, уводзячы новыя падаткі і зборы.
Мы зробім па-іншаму! Мы ўсё зробім лепш!
Да выхаду з крызісу – ніякіх новых збораў ды падаткаў.
Правядзем разумную прыватызацыю: у дзяржаўнай уласнасці застануцца толькі тыя прадпрыемствы, якія маюць стратэгічнае значэнне.
Дадзім свабоду ды падтрымку малому і сярэдняму бізнесу, перагледзім заканадаўства, каб вызваліць бізнес ад ціску, зменшым падаткі, зробім даступнымі крэдыты, здымем забарону на найм работнікаў індывідуальнымі прадпрымальнікамі.
Вернем рэальную і абароненую прыватную ўласнасць на зямлю для грамадзян Беларусі.
Дыверсіфікуем пастаўкі энерганосьбітаў для забеспячэння энергетычнай незалежнасці на аснове супрацы з краінамі Балта-Чарнаморскага рэгіёну.
Створым эканамічныя ўмовы для вяртання беларусаў, што працуюць за мяжой.
Падтрымаем інстытут сям’і і спынім выміранне беларусаў. Толькі апора на моцную сям’ю можа скараціць колькасць разводаў і абортаў, што
нішчаць будучыню нацыі.
Абаронім навакольнае асяроддзе: мы за развіццё ўзнаўляльных крыніц энергіі, зніжэнне спажывання вуглевадародаў, ільготы для альтэрнатыўнай энергетыкі і развіццё інфраструктуры для электрамабіляў. Пошліны на ўвоз электрычна-бензінавых аўтамабіляў павінны быць зменшаныя.
Падтрымаем здаровы лад жыцця і спынім алкагалізацыю насельніцтва.
Мы за павелічэнне бюджэту аховы здароўя да еўрапейскіх стандартаў у 6-8% ад валавога ўнутранага прадукту, за развіццё медычнага страхавання і страхавання адказнасці медработнікаў. Беларусам павінны быць даступныя як айчынныя, так і замежныя лекі.
Замест павышэння пенсійнага ўзросту – пераход да накапляльнай сістэмы, каб пенсійныя адлічэнні назапашваліся і выплачваліся пасля выхаду на пенсію. Сваякі пенсіянераў у выпадку іх смерці павінны наследаваць у спадчыну недаатрыманыя пенсійныя адлічэнні.
Падтрымка роднай мовы, нацыянальнай адукацыі і культуры – аснова нацыі і дзяржавы. Мы выступаем за вяртанне беларускай мове статусу адзінай дзяржаўнай.
Размеркаванне студэнтаў – выключна на добраахвотнай аснове.
Партыя БНФ выступае за адмену татальнай кантрактнай сістэмы.
Мы за вяртанне спрадвечных беларускіх сімвалаў: герба “Пагоня” і Бела-Чырвона-Белага сцяга.
Адновім дэмакратыю ды прававую дзяржаву на аснове прынцыпу падзелу галін улады. Законы павінны быць вышэйшыя за ўказы і дэкрэты. Свабода слова павінна быць гарантаваная для друку і для інтэрнэту. Мы за права жыхароў наўпрост абіраць кіраўнікоў выканкамаў.
Барацьба з карупцыяй – першачарговы прыярытэт: хто не краў – сядзець не будзе, а хто скраў – павінны
быць прыцягнуты да адказнасці.
Выйдзем з Еўразійскага саюза, які ёсць прычынай праблем у эканоміцы.
Створым бязвізавы рэжым з дзяржавамі Еўрасаюза.
Надзейна кантраляваная мяжа з Расіяй павінна спыніць паток злачыннасці, нелегальнай міграцыі ды наркотыкаў.
Беларусь мусіць выйсці з Арганізацыі дамовы аб калектыўнай бяспецы (АДКБ), якая пагражае ўцягваннем краіны ва ўзброеныя канфлікты ў Азіі.
Выдалім з Беларусі замежныя вайсковыя аб’екты і не дадзім размяшчаць тут новыя авіябазы РФ.
Забяспечым уваход Беларусі ў Сусветную гандлёвую арганізацыю (WTO), каб адкрыць нашым прадпрыемствам выхад на сусветны рынак, а беларусам даць доступ да якасных і танных тавараў.
БНФ мае праграму рэформ “Для Беларусаў!” паводле прынцыпу “Не народ для ўрада, а ўрад для народа!”, каб беларусы жылі годна і заможна ды былі гаспадарамі на сваёй зямлі.
З платформай Партыі БНФ можна азнаёміцца на сайце www.narodny.org.
Оперативные и актуальные новости Волковыска и района в нашем Telegram-канале. Подписывайтесь по ссылке!
Правила использования материалов "Наш час" читайте здесь.