Четверг, 21 Февраля 2019 12:11

Міжнародны дзень роднай мовы

Установы адукацыі вобласці прысвяцілі роднай мове цэлы тыдзень. У праграмах амаль кожнай былі акцыі “Гавары са мной па-беларуску” і агульныя дыктоўкі, конкурсы чытальнікаў вершаў, выканаўцаў музычных твораў на вершы беларускіх пісьменнікаў і сачыненняў, кніжныя выставы і творчыя сустрэчы, тэатралізаваныя пастаноўкі і вечарыны. Гэтаму ж дню прысвечаны і абласны конкурс відэаролікаў “У краіне роднай мовы”. Раённыя этапы яго завершаны, лепшыя ролікі размешчаны на сайце газеты “Гродзенская праўда”. Пераможцы будуць абраны шляхам галасавання.

Скарб бясцэнны У дзяржаўнай ўстанове адукацыі “Росскі яслі-сад” прайшоў тыдзень беларускай мовы, прысвечаны Міжнароднаму дню роднай мовы.

Кожны дзень выхаванцы ўдзельнічалі ў святах і забавах, іншых мерапрыемствах — чыталі казкі, завучвалі пацешкі, малявалі па вершах беларускіх паэтаў, а галоўнае — разам з бацькамі і выхавацелямі размаўлялі па-беларуску. Цікава была арганiзавана выстава мастацкай лiтаратуры для дзяцей “Кніга — скарб бясцэнны” і часопісаў “Вясёлка”, на якой дарослыя i дзецi змаглi пазнаёмiцца з вялікай колькасцю цудоўных твораў, напісаных на роднай мове.

Паспрабаваць свае сілы і атрымаць асалоду ад рухомых гульняў выхаванцы змаглі на фізічным свяце “Мы сябруем с Несцеркам”. З цікавасцю дзеці паглядзелі тэатралізаваную інсцэніроўку беларускай народнай казкі «Пшанічны каласок». Напрыканцы тэматычнага тыдня быў арганізаваны “Круглы стол” для бацькоў і выхаванцаў сумесна з супрацоўнікамі Роскай пасялковай бібліятэкі «Вучымся размаўляць па-беларуску», на якім дарослыя i дзецi змаглi пераканацца ў тым, якая мілагучная наша мова ў песнях, як прыгожа гучаць на ёй вершы, якая яна простая і дасціпная ў казках!

Гэты тыдзень стаў яшчэ адным крокам на шляху далучэння дзяцей дашкольнага ўзросту да роднай мовы, да культуры роднага краю.

Наталля МАМЗЕЛЕВА, намеснік загадчыка ДУА “Роскі яслі-сад”.

Прочитано 1035 раз Печать