Воўпаўская сельская бібліятэка запрасіла вучняў 3-4 класаў на гульню-віктарыну «Да роднай мовы крок зрабі». Школьнікі пазнаёміліся з лепшымі творамі класікаў і сучасных аўтараў беларускай літатратуры, успомнілі беларускія прыказкі і прымаўкі, загадкі і жарты. А бібліятэкар Вярэйкаўскай сельскай бібліятэкі правяла для шасцікласнікаў віктарыну «Каб бацькоўская мова непаўторнаю кветкай цвіла», падчас якой яны дзяліліся ведамі беларускага фальклору, спрабавалі сябе ў ролі перакладчыкаў і рэдактараў, чыталі вершы на роднай мове.

Турнір знаўцаў «Гучы, родная мова!» прайшоў у гарадской дзіцячай бібліятэцы. Удзельнікі клуба «Крынічка», падзяліўшыся на дзве каманды, выяўлялі лепшых знаўцаў беларускай мовы, а таксама нацыянальных традыцый у конкурсах «Перакладчыкі», «Назаві адным словам», «Апранаемся па-беларуску» і іншых.

У Ваўкавыскай раённай бібліятэцы для вучняў СШ № 8 прайшла гадзіна ведаў «Родная мова — душа народа». Разам з бібліятэкарамі школьнікі ўзгадалі паходжанне роднай мовы і паразважалі аб яе выкарыстанні ў сучаснасці. Вельмі зацікавіла моладзь легенда «Адкуль пайшлі беларусы», але найбольшае ажыўленне выклікала займальная гульня «Перакладны слоўнік», якая патрабавала ад удзельнікаў падабраць беларускія адпаведнікі да рускіх слоў і прыказак. Арганізатары пастараліся прапанаваць не самыя простыя словы. Але ж школьнікі паказалі выдатнаяе веданне роднай мовы і адказалі, што «маргаритка» па-беларуску — «стакротка», «беседка» — «альтанка», а беларускія «нагавіцы» — гэта звычайныя рускія «брюки».

Галоўны вывад, які зрабілі вучні падчас бібліятэчных сустрэч — што наша мова — не толькі частка нацяынальнай культуры, але і жывы сродак камунікацыі паміж людзьмі, які адпавядае запатрабаванням сучаснасці.

Алена Цярэшка, загадчык аддзела маркетынгу и сацыякультурнай дзейнасці Ваўкавыскай раённай бібліятэкі