Для кожнага беларуса важна ведаць сваю родную мову, валодаць ёй і выкарыстоўваць у жыцці. Беларусам неабходна захоўваць гістарычную памяць, жыць у міры і шанаваць традыцыі і культуру.
— З мэтай папулярызацыі беларускай мовы, удасканалення ведаў па роднай мове было прапанавана прыняць удзел у абласным дыктанце, прысвечаным Міжнароднаму дню роднай мовы, — адзначыла метадыст Ваўкавыскага раённага вучэбна-метадычнага кабінета Ларыса Рачкоўская.
Карэспандэнт газеты «Наш час» прысутнічала ў гімназіі № 1 г. Ваўкавыска падчас правядзення дадзенага мерапрыемства. Яго ўдзельнікамі сталі педагогі гімназіі і вучні. Усе хваляваліся, як быццам першы раз садзіліся за школьныя парты. Далучыцца да дыктоўкі мог любы: з сабой неабходна было ўзяць ручку. Шпаргалкі не забароненыя, тэлефоны ніхто не патрабаваў здаваць. Тут трэба было напісаць на сумленне.
Удзельнікі пісалі пад дыктоўку ўрывак тэксту “Музейная гара” беларускага пісьменніка Уладзіміра Ліпскага. Тэкст не складаны і зразумелы па сэнсе. Пасля напісання свае веды можна было праверыць самастойна.
Дадзенае мерапрыемства спрыяе бесперапыннай сувязі пакаленняў. Па словах дырэктара гімназіі № 1 г. Ваўкавыска Алены Рыбак, ужо традыцыйна ў Міжнародны дзень роднай мовы педагогі і навучэнцы далучаюцца да напісання дыктоўкі на беларускай мове.
— Мы павінны паважліва ставіцца да роднай мовы. Гэтым мы таксама выказваем сваю павагу да гісторыі і продкаў, — дадала Алена Вікенцьеўна.
Тыдзень беларускай мовы, які зараз праходзіць у краіне, прадугледжвае яшчэ шмат мерапрыемстваў: круглыя сталы, інтэрактыўныя заняткі і іншыя культурна-асветніцкія падзеі.
Фота аўтара
Оперативные и актуальные новости Волковыска и района в нашем Telegram-канале. Подписывайтесь по ссылке!
Правила использования материалов "Наш час" читайте здесь.