— Да гэтага іспыту я пачаў рыхтавацца яшчэ пазамінулай зімой і працаваў планамерна, так што на падрыхтоўку ў мяне было прыкладна паўтара гады. Гэта добры варыянт, каб не напружвацца ў апошнія дні, рэкамендую ўсім дзейнічаць такім чынам. Важную ролю ў маім поспеху адыграла наша настаўніца Ларыса Уладзіміраўна Мігдалёнак, на яе ўроках я прадуктыўна працаваў, напэўна, гэта і дало свой плён.

Увогуле, матэматыка мне падабаецца. Пры гэтым я лічу, што школьная матэматыка — толькі невялікая частка цэлага свету матэматыкі, і, напрыклад, у вышэйшых навучальных установах гэта навука значна больш складаная. Таму ўлетку планую шчыльна заняцца менавіта вышэйшай матэматыкай. Аднак сваё жыццё ўсё ж хачу звязаць з хіміяй. Гэта навука для мяне — асобны від задавальнення, я ўспрымаю яе як мастацтва. Мне вельмі падабаецца змешваць у прабірках розныя рэчывы, кожны раз адкрываць для сябе іх новыя ўласцівасці. Ёсць жаданне стаць вучоным, таму збіраюся паступаць на хімічны факультэт Белдзяржуніверсітэта, на спецыяльнасць “Фундаментальная хімія”. Цэнтралізаванае тэсціраванне па хіміі я, вядома ж, таксама здаваў, аднак яго вынікі стануць вядомы пазней.