Толькі надзейная таварыскасць (ці таварыства?) здольна перарасці ў цеснае сяброўства (ці сябрыну?) і стаць сапраўдным братэрствам. Так складваюцца людскія адносіны. Так складваюцца лёсы цэлых дзяржаў. Сёння адзначаецца Дзень яднання (ці еднасці?) народаў Беларусі і Расіі. 25 гадоў мінула з таго самага дня, калі было заключана пагадненне (ці згода?) і падпісаны дагавор аб Саюзе паміж дзьвюма дзяржавамі.
АДЧУЙ РОЗНІЦУ
Таварыскасць (рус. товарищество; товарищеские отношения). Даверлівасць, сяброўства ў адносінах. Атмасфера таварыскасці — лепшае, што можа быць у калектыве.
Таварыства (рус. товарищество, дружба; компания).
- Група людзей, аб’яднаных агульнымі інтарэсамі, заняткам. Гэта было сапраўднае таварыства аднадумцаў.
- Арганізацыя — вытворчая, гандлёвая, навуковая, у якую ўваходзяць раўнапраўныя ўдзельнікі (рус. общество). Праўда, гэта не так проста, спачатку створым навуковае таварыства. І. Новікаў.
Сяброўства (рус. дружба, товарищество). Блізкія адносіны, якія грунтуюцца на агульнасці інтарэсаў, духоўнай блізкасці. Я даўно шукаў прычыны, каб сяброўства нам пачаць. В. Вітка.
Сябрына (рус. содружество, круг друзей). Кола сяброў; сяброўская бяседа, пачастунак. Гэта была сапраўдная сябрына таварыскага даверу.
Еднасць (рус. единство, сплочённость).
- Адзінства, згуртаванасць. Такой кнігі аб еднасці чалавека і роднай зямлі, чалавека і прыроды ў нас даўно не было. Н. Гілевіч.
- Агульная супольнасць (рус. единство, общность, согласие). Няма ў жыцці нічога лепшага, чым час, асветлены еднасцю маладых сэрцаў і парыванняў. І. Навуменка.
Яднанне (рус. единение, сплочение).
- Дзеянне паводле значэнняў дзеясловаў яднаць і яднацца — злучацца, збліжацца, утвараючы адзінае цэлае; згуртоўвацца. Усё цягнула плямёны да яднання. У. Караткевіч.
- Адзінства, згуртаванасць. (рус. единение, сплочённость). Бо яднанне — сіла ў свеце, хто ж дурэй ад грамады. Я. Колас.
Згода (рус. согласие).
- Станоўчы адказ, дазвол. Начальства дало згоду.
- Узаемная дамоўленасць. Мы прыйшлі да згоды.
- Супадзенне думак, аднадушша. Згода паміж імі была па любым пытанні.
- Мірныя сяброўскія адносіны. Лад і згода ў кожнай хаце.
- Безас. у значэнні выклічніка. — Сустракаемся ўвечары. — Згода!
Пагадненне (рус. соглашение).
- Дагавор, які абумоўлівае абавязацельствы. Падпісана двухбаковае пагадненне.
- Прымірэнне, згода (рус. примирение). Супрацьстаянне скончылася ўзаемным пагаднененнем.
Оперативные и актуальные новости Волковыска и района в нашем Telegram-канале. Подписывайтесь по ссылке!
Правила использования материалов "Наш час" читайте здесь.