Вядучыя мітынга Кацярына Маршанюк і Віталій Плаўнік расказалі прысутным пра значэнне сённяшняга свята — Дня Дзяржаўнага герба і Дзяржаўнага сцяга Рэспублікі Беларусь, які традыцыйна адзначаецца ў другую нядзелю мая. “Гэта свята свабоды, грамадзянскага міру і добрай згоды ўсіх людзей на аснове закона і справядлівасці, сімвал нацыянальнага яднання і агульнай адказнасці за цяперашні час і будучае нашай Радзімы. Свята дзяржаўных сімвалаў Рэспублікі Беларусь аб’ядноўвае ўсіх патрыётаў Айчыны, усіх, хто шануе дзяржаўную гісторыю, шматнацыянальную культуру, векавыя традыцыі, верыць у дастойную будучыню дзяржавы”, — адзначылі вядучыя.

Ганаровае права ўзняць Дзяржаўны сцяг пад гукі Дзяржаўнага гімна Рэспублікі Беларусь, які выканалі ўдзельнікі ўзорнага хору “Атлантида” Ваўкавыскай дзіцячай школы мастацтваў пад кіраўніцтвам Наталлі Пракапені, было прадастаўлена старшыні Ваўкавыскага райвыканкама Міхаілу Сіцько, старшыні Ваўкавыскага раённага Савета дэпутатаў Віталію Навіцкаму, а таксама вучням школ і гімназій горада — прызёрам рэспубліканскіх алімпіяд па вучэбных прадметах, міжнародных і рэспубліканскіх канферэнцый і аглядаў-конкурсаў: Аляксандры Герасімчук, Міхаілу Добашу, Анастасіі Клімовіч, Ксеніі Лявіцкай, Вікторыі Казімірчык, Паліне Крысюкевіч, Івану Музычку, Кацярыне Градовіч і Амеліі Сакалоўскай. Напрыканцы мітынгу ўрачыстым маршам перад святочнай пляцоўкай прайшлі вайскоўцы стралковага батальёна.

Фота аўтара i Яўгена Грымайла