Мерапрыемствы для дзетак такога ўзросту па працягласці павінны быць не больш за 20 мінут. Але і за гэты невялікі прамежак часу выхавацель Ганна Дзенісюк і музычны кіраўнік Алена Барцякова разам з выхаванцамі паспелі па-сапраўднаму яскрава і музычна адзначыць традыцыйнае восеньскае свята.

Апранутыя ў народныя касцюмы дзеці з задавальненнем выконвалі беларускія народныя песні, чыталі вершы на роднай мове, па-даросламу разважалі над сэнсам прыказак і прымавак, з неймаверным імпэтам гулялі ў традыцыйныя гульні. Па душы бацькам, што запоўнілі залу ў якасці гледачоў, прыйшліся і вясёлая народная песня “Сеў жучок на сучок”, і чулая “Матухна зямля”. Дарослыя, па-дзіцячы парушаючы правілы, актыўна дапамагалі дзецям падказкамі падчас гульні “Адгадай, чый галасок”. Апладысменты сарвала інсцэніроўка “Галодны вусень”, героямі якой выступілі сапраўдныя маленькія акцёры.

Інсцэніраванае свята “Багач” не толькі ўсхваліла багаты ўраджай, але і па-сапраўднаму ўзбагаціла душу кожнага дзіцяці і дарослага.