Раніцай 10 мая на пляцоўцы Дзяржаўнага сцяга па вуліцы Панковай сабраліся прадстаўнікі мясцовай улады, працоўных калектываў і сілавых структур, актывісты партый і грамадскіх аб’яднанняў, вучнёўская моладзь і іншыя гараджане, неабыякавыя да гісторыі і сімволікі сваёй Радзімы. Аб гатоўнасці сілавікоў раёна да правядзення свята традыцыйны даклад старшыні раённага Савета дэпутатаў Сяргею Якімовічу зрабіў ваенны камісар Ваўкавыскага, Бераставіцкага і Свіслацкага раёнаў палкоўнік Уладзімір Герасімчук. У гонар дзяржаўных сімвалаў, адкрываючы мерапрыемства, прагучаў Дзяржаўны гімн Рэспублікі Беларусь у выкананні дзіцячага хора “Атлантида”, а выхаванцы ваенна-патрыятычнага клуба “Бастион” урачыста ўнеслі вялікі Дзяржаўны сцяг. З прывітальным словам да прысутных звярнуўся Сяргей Якімовіч.

— Гэта свята сімвалізуе адзінства, суверэнітэт і гістарычную пераемнасць нашага народа, аб’ядноўваючы ўсіх грамадзян вакол галоўных атрыбутаў незалежнасці краіны. Дзяржаўныя сімвалы — гэта духоўны стрыжань нацыі. Асабліва сімвалічна, што гэта свята адзначаецца адразу пасля Дня Перамогі. Блізкасць гэтых свяшчэнных дат служыць вечным напамінам аб гераізме нашых продкаў, якія адстаялі права на незалежную будучыню, аб нашай адказнасці за захаванне міру і росквіт роднай зямлі. Гэтыя свяшчэнныя сімвалы аб’ядноўваюць нас у адну вялікую сям’ю, адлюстроўваюць духоўныя каштоўнасці беларускага народа. У іх увасоблены нашы дасягненні ў працы, перамогі на спартыўных арэнах і мірнае неба над роднай зямлёй. Шанаваць свае галоўныя сімвалы, выхоўваць у падрастаючага пакалення пачуццё павагі да іх, а разам з тым пачуццё гонару і адказнасці за нашу рэспубліку — доўг кожнага яе жыхара, — адзначыў у сваім выступленні старшыня раённага Савета дэпутатаў.

Традыцыйна ў гэты дзень лепшыя прадстаўнікі вучнёўскай моладзі раёна ўрачыста развіталіся з піянерскім гальштукам і атрымалі членскія білеты Беларускага рэспубліканскага саюза моладзі. Зямлі пад белымі крыламі аднайменны нумар прысвяцілі вакалісткі раённага Цэнтра культуры і ўдзельніцы ўзорнай студыі танца “Горячий лед”. Завяршылася мерапрыемства выкананнем Дзяржаўнага гімна і ўрачыстым маршам, якім прайшлі ваеннаслужачыя і прадстаўнікі іншых сілавых структур Ваўкавышчыны.