Як і штогод у гэты дзень, каля Вечнага агню ў Скверы Памяці сабраліся жыхары і госці Ваўкавыска, прадстаўнікі кіраўніцтва раёна, працоўных калектываў і грамадскіх арганізацый, ветэраны і моладзь, сілавікі і духавенства, госці з гарадоў-партнёраў з Расійскай Федэрацыі. "Наша зямля была, ёсць і будзе зямлёй герояў, якія мужна адстаялі нашу краіну ў гады Вялікай Айчыннай вайны дзеля таго, каб сёння мы жылі ў мірнай і незалежнай дзяржаве", - адзначылі вядучыя мітынгу. Прагучаў Дзяржаўны гімн Рэспублікі Беларусь, а затым да прысутных звярнуўся старшыня Ваўкавыскага раённага Савета дэпутатаў Сяргей Якімовіч.

- Дзень Незалежнасці - гэта найважнейшая дата ў гісторыі станаўлення беларускай дзяржавы. Гэта сімвал суверэнітэту і свабоды нашай Радзімы, гераічнай мінуўшчыны і годнай будучыні беларускага народа. Для кожнага беларуса гэта свята напоўнена асаблівым сэнсам. Наша гісторыя - пастаянная барацьба за сваю зямлю і духоўныя каштоўнасці. Гэта свята аб'ядноўвае ўсіх, хто шануе слаўную гісторыю сваёй Айчыны і верыць у яе годную будучыню, каму дарагія і зразумелыя нашы агульныя каштоўнасці: гонар за краіну, жаданне працаваць для яе працвітання, любоў да сваёй сям'і, родных і блізкіх. У гэты дзень мы аддаём даніну найвялікшай павагі подзвігу ветэранаў, нізка схіляем галовы перад загінуўшымі ў баях за свабоду і незалежнасць Радзімы. Нядзіўна, што гэта свята прасякнута пачуццём бязмежнай падзякі тым, хто ў гады Вялікай Айчыннай вайны абараніў нашу зямлю. Наш святы абавязак - шанаваць памяць аб подзвігу савецкага народа, самаахвярная любоў да Радзімы якога - прыклад для падрастаючых пакаленняў, - сказаў кіраўнік дэпутацкага корпусу раёна.

На некалькі драматычных хвілін артысты Ваўкавыскага раённага цэнтра культуры перанеслі ўсіх прысутных у жудасныя саракавыя, прасачыўшы гаротныя лёсы беларускіх жанчын у ліхія ваенныя часы. "Кожны трэці аддаў сваё жыццё, каб сёння мы стаялі пад гэтым мірным небам. Яны сышлі ў вечнасць, пакінуўшы гэту зямлю... і гэту глыбокую, святую цішыню", - прагучалі словы дыктара. Памяць загінулых у гады Вялікай Айчыннай вайны ўсе прысутныя ўшанавалі хвілінай маўчання. А затым усклалі кветкі да помнікаў Сквера Памяці.

Фото А. Макар