Дзень беларускага пісьменства — гэта не проста прыгожае свята, да якога рыхтуецца і сам горад, і яго жыхары: наводзіцца парадак, добраўпарадкоўваецца тэрыторыя, падрыхтоўваецца насычаная культурная праграма. Гэта найважнейшая падзея, якая сімвалізуе адзінства нашага народа і ўмацаванне нацыянальных духоўных каштоўнасцей.

Прэзідэнт Беларусі Аляксандр Лукашэнка адзначаў, што менавіта пісьменства аб'ядноўвае наша мінулае, сучаснасць і будучыню, захоўвае сувязь пакаленняў як найвышэйшую каштоўнасць. “Непахісная вера, багатая культурная спадчына і шчырае, таленавітае і праўдзівае слова здольны зберагчы згоду паміж народамі і падарыць усім надзею на лепшае”, — сказаў кіраўнік дзяржавы.

Штогадовае правядзенне Дня беларускага пісьменства — свята нашай роднай мовы, кнігі, прэсы, творчых людзей, гісторыі нашай культуры — вырашае задачу беражлівага захавання і развіцця духоўнай спадчыны краіны, прапаганды нацыянальных культурных традыцый, выхавання патрыятызму, дэманстрацыі пастаяннага клопату дзяржавы аб духоўна-маральным развіцці грамадства ў кантэксце падтрымкі нацыянальнай літаратуры і кнігавыдання, заахвочвання аўтараў і стварэння ўмоў для выяўлення і развіцця новых талентаў.

На кожнае такое свята збіраюцца тысячы гасцей з усёй Беларусі і замежжа. Традыцыйна ў мерапрыемствах Дня беларускага пісьменства бяруць удзел кіраўнікі органаў дзяржкіравання, дзеячы культуры, навукі, літаратуры, мастацтва, прадстаўнікі пасольстваў, акрэдытаваных у Рэспубліцы Беларусь, замежныя дэлегацыі.

Як і любое маштабнае мерапрыемства, 32-гі Дзень беларускага пісьменства, не абыдзецца без удзелу журналістаў. Міністэрства інфармацыі арганізуе ў Лідзе вялікі фестываль кнігі і прэсы, на пляцоўках разгорнуцца прэзентацыі тэматычных праектаў рэспубліканскіх і рэгіянальных СМІ, будуць уручацца ўзнагароды пераможцам прафесійных конкурсаў. А галоўнае — тое, што ўбачаць, здымуць і напішуць работнікі прэсы, убачыць і прачытае ўся краіна.