Раніцай яна, стыльная і прыгожая, сустракае ў файе сваіх вучняў і калег простым прывітаннем, добрым настроем, прыемнай усмешкай. Пра сваё дзяцінства яна таксама ўспамінае з усмешкай, таму што была вельмі вясёлай, дапытлівай і гарэзлівай дзяўчынкай. Да школы трэба было дабірацца тры кіламетры, але разам з сябрамі гэты час пралятаў непрыкметна. Тамара Васільеўна яшчэ ў школе любіла гуляць з сяброўкамі ў настаўніцу, любіла знаходзіць у іх сшытках памылкі. Гэтыя гульні перараслі ў выбар прафесіі, якая лічылася самай прэстыжнай. І навучальную ўстанову яна выбрала не менш прэстыжную — БДУ. Тамара і ў юнацтве была пераканана, што слова “настаўніца” паходзіць ад слова “настаўляць” — на шлях праўдзівы, творчы. Так, для Тамары Васільеўны яе прафесія, яе работа — гэта самая галоўная чалавечая каштоўнасць, менавіта праца, як яна лічыць, робіць жыццё чалавека асэнсаваным і шчаслівым.

Яшчэ ў пачатковых класах у Тамары праявіліся матэматычныя здольнасці і лагічнае мысленне, лідарскія якасці — у старэйшых класах і студэнцкія гады. Менавіта яна была завадатарам усіх спраў, мерапрыемстваў і гульняў. Да яе меркаванняў прыслухоўваліся аднакласнікі і аднакурснікі. Таленавітая, разумная, творчая, актыўная студэнтка была нязменным камандзірам будаўнічага атрада, які працаваў у Малдавіі. Пасля заканчэння механіка-матэматычнага факультэта БДУ ў 1983 годзе Тамара Васільеўна працавала настаўніцай у спецшколе ў пасёлку Поразава, затым у школах № 4 і 7 Ваўкавыска, і вось ужо 21 год адданы гімназіі № 2. Хаця яна матэматык, але мае аратарскія здольнасці, пачуццё гумару, можа падняць настрой рознай аўдыторыі. Выбар кандыдатуры дырэктара з боку кіраўніцтва раёна быў зроблены правільны: на працягу апошніх пяці гадоў гімназія пад чулым кіраўніцтвам Тамары Васільеўны Федарэнкавай займае лідзіруючае месца сярод устаноў адукацыі. Прыгожая жанчына зрабіла прыгожай нашу гімназію: змяніўся выгляд, новыя вокны і дзверы, прыгожае файе з плазмай, новая мэбля амаль ва ўсіх кабінетах, зручныя ступенькі і поручні каля школы. Адрамантаваны сталоўка, актавая і спартыўная залы. Але галоўнае — поспехі гімназістаў. Навучэнцы гімназіі № 2 — пераможцы раённых, абласных і рэспубліканскіх алімпіяд. 25 выпускнікоў гімназіі з'яўляюцца стыпендыятамі спецыяльнага фонду Прэзідэнта Рэспублікі Беларусь па сацыяльнай падтрымцы адоранай моладзі, дзевяць — стыпендыятамі абласной прэміі імя А. І. Дубко, пяцёра — абласнога аддзела Беларускага фонда міру. Яны — паспяховыя студэнты вну краіны.

Тамара Васільеўна ў пастаянным пошуку правільных напрамкаў дзейнасці, эфектыўных формаў і метадаў, новых тэхналогій выхавання і навучання. Дырэктар сваім прыкладам паднімае калектыў да перамог ва ўсіх настаўніцкіх конкурсах: яна цудоўна спявае, танцуе. Кожны год мы адпраўляемся ў падарожжа па сваёй прыгожай краіне, і кожны год яна разам з намі, менавіта яна — душа кампаніі.

А працаваць яна гатова да “седьмого пота”, і гэта як раз той выпадак, калі праца стала і лёсам, і сэнсам жыцця.

Тэрэза КАВАЛЬЧУК, загадчык бібліятэкі гімназіі № 2