Ён распачаўся ў цэнтры рамёстваў г. п. Рось, дзе адбыўся семінар-практыкум «Сучасныя падыходы арганізацыі культурна-дасугавай дзейнасці ва ўстановах культуры з рознымі ўзроставымі катэгорыямі насельніцтва: традыцыйная культура Ваўкавыскага раёна, яе захаванне і пераемнасць». Падчас мерапрыемства ўдзельнікам быў прадстаўлены відэафільм аб дзейнасці Ваўкавыскага раённага цэнтра рамёстваў, яго спецыялісты падзяліліся сваім вопытам работы па захаванні нематэрыяльнай спадчыны на Ваўкавышчыне. Удзельнікі пазнаёміліся з народным майстрам Беларусі па ткацтву Любоўю Балёнь, якая з’яўляецца носьбітам элемента нематэрыяльнай культурнай спадчыны — традыцыі простага двухнітовага ткацтва, наведалі творчую майстэрню па ткацтву і атрымалі майстар-клас ад народнага майстра і яе пераемніцы — Яніны Іюльскай. Акрамя таго, падчас семінара адбыліся выступленні фальклорных калектываў «Ваўпянка» і «Спадарыня», майстар-клас па побытавых танцах і круглы стол «Нематэрыяльная культурная спадчына Беларусі. Культурныя каштоўнасці Ваўкавыскага раёна — учора, сёння, заўтра».