Ваўкавыскі раён на свяце прадставілі работнікі Цэнтра рамёстваў г. п. Рось, якія прывезлі частку сваёй багатай этнаграфічнай калекцыі: тканыя дываны, посцілкі і рушнікі, ткацкія прылады, а таксама калекцыю жаночага і мужчынскага адзення ваўкавыскага строю. Метадыст цэнтра Аксана Талькоўская пазнаёміла гасцей свята з асаблівасцямі развіцця ткацтва ў нашым раёне, а майстар народных рамёстваў, член Беларускага саюза мастроў народнай творчасці Яніна Іюльская правяла майстар-клас па простаму двухнітоваму ткацтву Ваўкавышчыны, якое занесена ў спіс гісторыка- культурнай спадчыны Беларусі. Усе жадаючыя змаглі сесці за кросны і сваімі рукамі саткаць некалькі радкоў у старажытнай тэхніцы, захаванай да нашага часу.

Падчас свята было прэзентавана тэкстыльнае палатно “Квецень Панямоння”, складзенае з фрагментаў, падрыхтаваных цэнтрамі рамёстваў з розных раёнаў вобласці. Сярод іх сваё месца занялі ўзоры тканага палатна і дывана ў традыцыйнай ваўкавыскай тэхніцы.