Я трапіла на ўнікальнае, заварожваючае свята. Праграма фестывалю складалася з розных конкурсаў, спартыўных спаборніцтваў і гістарычных экскурсаў у мінулае хлеба. Адкрыццё фестывалю таксама было нязвыклым. Сапраўдны трактар з вялікім прыгожым караваем, нібы лялечны, цягнуў на вяроўцы нейкі сілач.

Перш за ўсё кідаліся ў вочы прыгожыя і нязвыклай формы караваі. Вялікія пернікі, замкі, млыны, трактар — усё было зроблена з хлеба. А шэдэўрам стаў 25-кілаграмовы каравай, упрыгожаны кветкамі, каласкамі і рознымі птушкамі і жывёлінамі. Яго прыгатавала Ганна Ясюкевіч з Воранаўскага раёна. Прыцягвалі погляды гасцей цікавыя выставы хлебных вырабаў з назвамі “Матулін каравай”, “Хлебныя шэдэўры”. Апошняя выстава была яшчэ і конкурсам, і пераможцаў узнагароджвалі граматамі і кветкамі на сцэне. З нашага горада Ваўкавыска таксама быў прадэманстраваны каравай, ад якога хацелася адразу адламаць кавалак і з’есці. А спякла яго па бабулінаму рэцэпту Вольга Карэцкая.

Гульнёвы экскурс “Ад зярна да хлеба” пазнаёміў моладзь і школьнікаў з усімі этапамі прыгатавання хлеба. Зерне спачатку трэба было ўдзельнікам падсушыць, потым адвезці на млын, а па дарозе адгадаць, якая зернавая культура знаходзіцца ў мяшках. Гэта было чароўнае відовішча, калі ўдзельнікі сваімі рукамі замешвалі цеста і ляпілі “Бацькаву булку”, якой потым маглі самі частавацца.

Якіх толькі вырабаў мясцовых і прыезжых майстроў ні было на плошчы! Свае вырабы прэзентаваў таксама муж маёй сястры Ірыны — Мячаслаў Саўко. Каля яго вельмі многа затрымлівалася гасцей, карціны, шкатулкі і лямпы з бярозавай чагі ўсім спадабаліся.

Якіх там толькі ні было конкурсаў, вяртаючых да мінулага! Трэба было змалаціць зерне цэпам, і такая праца для ўдзельнікаў аказалася вельмі цяжкай. На возе трэба было адвезці мяшкі з зернем на млын, а з саломай — да печы. І шмат іншага.

Не меньш цікавым быў і канцэрт з удзелам знакамітых артыстаў беларускай эстрады. Я чакала, каб пабачыць сваімі вачыма і паслухаць сваіх любімых артыстаў: пераможцу конкурсу “Фактор.by” Андрэя Панісава і знакамітага Аляксандра Саладуху. Канцэрт быў цудоўным, і такіх дружных апладысментаў я ў сваім жыцці яшчэ ніколі не чула. А вядучыя канцэрта апавядалі, што трэба рабіць, каб разам з хлебам у хату прыходзіла шчасце і каханне.

Фестываль “Бацькава булка” — гэта сапраўднае свята душы, песні і хлеба, і я на яго буду ездзіць заўжды, бо іначай не змагу. Гэтае свята дае нам зразумець, якое вялікае значэнне для нашай краіны мае хлеб, і “Бацькава булка” выхоўвае ў нашай моладзі павагу да хлеба і хлебаробаў.

Тэрэза КАВАЛЬЧУК, загадчык бібліятэкі ДУА “Гімназія № 2 г. Ваўкавыска”