Калектывы Ваўкавыскага раёна таксама прынялі ўдзел у фестывальных мерапрыемствах. У вакальным конкурсе Ваўкавыскі раён прадставілі ўзорны фальклорны гурт “Чобаты” гарадскога Дома культуры і народны фальклорны гурт “Чараўніцы” філіяла “Мацвееўскі Дом культуры”. Супрацоўнікі Ваўкавыскага раённага Цэнтра культуры прадставілі жыхарам горада і гасцям свята фрагмент абраду “Заручыны”, мясцовыя стравы з таркаванай бульбы, у тым ліку “Бонды на дубовых лістах”, якія з’яўляюцца элементам нематэрыяльнай культурнай спадчыны Гродзенскай вобласці, і вясельны каравай — элемент нематэрыяльнай культурнай спадчыны “Комплекс ведаў і навыкаў па вырабу традыцыйнага вясельнага каравая на Ваўкавышчыне”. Народны тэатр-студыя гульні “Ваўкавыскія забавы” прапанаваў гасцям “Ваўкавыскага падворка” цікавую забаўляльную праграму, а ўзорны фальклорны гурт “Чобаты” — канцэрт. Майстры Цэнтра рамёстваў прэзентавалі традыцыйны народны жаночы, мужчынскі і дзявочы строй Ваўкавыскага раёна, унікальныя хатнія калекцыі ткацтва, саломапляцення, тэкстыльнай лялькі, чорнадымленай керамікі і вышыванкі, правялі майстар-класы па ганчарству, мастацкай кераміцы, саломапляценню, вышыўцы, мастацкаму роспісу і ткацтву паясоў.

“Ваўкавыскі падворак” спадабаўся і гасцям свята, і журы, і ў конкурсе “Лепшы падворак традыцыйнай культуры” быў адзначаны дыпломам lll ступені.