АДЧУЙ РОЗНІЦУ

Спаткацца (рус. встретиться, увидеться, сойтись). Трапіцца насустрач, сутыкнуцца, дакрануцца. Спаткаліся закаханыя штовечар.

Спаткнуцца (рус. споткнуться, оступиться, запнуться). Заходзячы ў хату, штораз спаткнуся аб парог.

Прысуд (рус. приговор). Рашэнне суда або іншай арганізацыі меркаванне. Прысуд быў вынесены строгі.

Суд (рус. суд). 1. Дзяржаўная ўстанова. 2. Судовы працэс. 3. Думка, меркаванне, ацэнка. Справа аб злачынстве была заслухана ў судзе.

Змушаць (рус. вынуждать, принуждать). Прымушаць. Змушаць яго ніхто не мае права.

Мусіць (рус. быть должным). 1. Быць прыняволеным, абавязаным. Старэйшы ў сям’і мусіць быць прыкладам для малодшых. 2. Пабочн. (рус. вероятно, пожалуй, должно быть, видно, никак). Ён, мусіць, забыў пра лекцыі ў суботу.

Замах (рус. покушение, посягательство, взмах, размах). Спроба пазбавіць жыцця; захапіць, нанесці страту; адвесці руку для ўдару. Замах на жыццё — страшнае злачынства.

Замашка (рус. замашка). Манера, звычка, схільнасць. Жывучы ў вёсцы, замашкі меў гарадскія.

Спроба (рус. попытка). Намаганне зрабіць што-небудзь. Першая спроба можа быць няўдалай.

Проба (рус. испытание). Выпрабаванне. Пробу на вынослівасць вы прайшлі.

Гаспадарлівы (рус. хозяйственный). Руплівы, ашчадны, эканомны ў вядзенні гаспадаркі. Чалавекам ён быў гаспадарлівым.

Гаспадарскі (рус. хозяйский). Які належыць гаспадару. Гаспадарскія пакоі былі шыкоўныя.

Гаспадарчы (рус. хозяйственный). Звязаны з вядзеннем гаспадаркі. Гаспадарчыя пабудовы размяшчаліся амаль побач.

Спадніца (рус. юбка). Жаночае адзенне. Частка сукенкі ад таліі ўніз. З-пад доўгай спадніцы выглядалі зграбныя чаравікі.

Споднікі (рус. подштанники, исподники). Доўгія сподныя штаны. Споднікі ледзь трымаліся вяроўкаю на жываце.